அறிவியல் ஆயிரம்... சாட்டை தேள் பற்றிய தகவல்கள்.

அறிவியல் ஆயிரம்...

சாட்டை தேள் பற்றிய தகவல்கள்..

இதன் பெயர் சாட்டை தேள் என்றிருந்தாலும், சிலந்திகளை மிக நெருங்கியது. இந்த பிராணி தேள் குடும்பத்தை சேர்ந்தது தான், ஆனால் தேள் அல்ல, விஷமுள்ளதல்ல. அச்சுறுத்தப்படும்போதோ, தாக்கவேண்டும் என்றாலோ, தனது அடிவயிற்றிலிருந்து அசிட்டிக் ஆசிட், கபிலரிக் ஆசிட் ஆகியவற்றின் கலவையை பீய்ச்சி அடிக்கும். அதனாலேயே அதற்கு வினீகரூன் என்று பெயரும் உண்டாம். 

உலகெங்கும் பூமத்தியரேகை பகுதியில் காணப்படும் இது, ஆஸ்திரேலியாவிலும், ஐரோப்பாவிலும் மட்டும் கிடையாதாம். வடஅமெரிக்காவிலிருக்கும் இதன் சகோதரனுக்கு சிகப்பு நிற சாட்டைபோன்ற நீண்ட முன்கால்கள் உண்டு. 

இவை மாமிசபட்சணிகள், இரவாடிகள். சருகுகள், மரத்துண்டுகளினடியில் ஈரப்பதமுள்ள, வெளிச்சம் படாத இடங்களில் ஒளிந்து வாழ்கின்றன.

இவை தமது முன்கால்களிலுள்ள இரட்டை கொக்கி போன்ற கொடுக்குகளின் மூலம் சிறு பூச்சிகள், புழுக்கள், பூரான், தேள் போன்றவற்றை பிடித்து நசுக்கி கொன்று தின்கின்றன.

பெண் பூச்சிகள் சுமார் 40 முட்டைகள் வரை ஒரு பைக்குள் இட்டு, அவற்றை தரையில் படாமல் ஓரிரு மாதங்கள், அதாவது பொரிக்கும்வரை தூக்கிக்கொண்டே திரியும்.