மனிதனுக்கும் முந்தியவை பூச்சிகள்! கண்டுபிடிப்பு..

மனிதனுக்கும் முந்தியவை பூச்சிகள்!

கண்டுபிடிப்பு..

www.tamilsciencenews.in

மனிதன் உலகில் தோன்றுவதற்கு முன்பே பூமியில் தோன்றி வாழ்ந்து வரும் பெருமை பூச்சியினங்களுக்கு உண்டு. இவற்றின் ஆற்றலும், சிந்தனைக்கே எட்டாத பணிகளும் நம்மை வியக்க வைக்கின்றன. சமீப காலம் வரை புதிராக இருந்த பூச்சியினங்களின் வாழ்க்கை விசித்திரங்களை இயற்கை ஆய்வாளர்கள் தமது நுண்ணறிவைக் கொண்டு, உழைப்பு, துணிவின் மூலமும் கண்டுபிடித்திருக்கின்றனர். பூமியின் உண்மையான `பழங்குடிகள்’ பூச்சிகளே.

பல்வேறு விதமான எதிரிகளை எதிர்த்துப் போராடி பல லட்சம் ஆண்டுகளாகப் பூமியில் நிலைத்து நிற்கும் பூச்சியினம், இயற்கையின் படைப்பில் ஒரு முக்கிய இடத்தைப் பெற்றிருக்கிறது. பல துறைகளில் மனிதனின் திறனுக்கு அப்பாற்பட்ட அதிசயத் திறனை பூச்சியினம் பெற்றிருக்கிறது.

பூச்சி இனத்தில் தச்சுத் தொழிலாளர்கள், மண்பாண்ட விற்பன்னர்கள், வீரர்கள், பாடகர்கள், அஞ்சா நெஞ்சுறுதி படைத்தவர்கள், கட்டிடக் கலைஞர்கள், பொறியியல் வல்லுநர்கள் என்று பலரும் உள்ளனர் என்றால் ஆச்சரியமாயில்லை?

மனிதனுக்கு முன்பே கரையான்கள் அடுக்குமாடிக் குடியிருப்புகளை அமைத்திருக்கின்றன. குளவிகள் காகிதமும், சுண்ணாம்புச் சாந்தும் உற்பத்தி செய்திருக்கின்றன. கம்பளிப் பூச்சிகள் நெசவுத் திறன் வாய்ந்தவையாக உள்ளன. எறும்புகள் தமது கூட்டு முயற்சியால் மண் குன்றுகளில் `பெருநகர் களை’ அமைத்திருக்கின்றன.

இப்படி பூச்சியினங்களை ஆராயும்போது அவை ஏற்படுத்தும் ஆச்சரியம் விரிந்துகொண்டே போகிறது.